फ्याक्टचेकः नेपाली सेनाले २ मिटरबाट नागरिकलाई गोली ताकेको देखिने भाइरल तस्विर एआई निर्मित

काठमाडौं । पछिल्लो केही दिन यता सामाजिक सञ्जाल फेसबुकमा सुनसरीमा भइरहेको प्रदर्शनको भन्दै एउटा तस्बिर व्यापक रूपमा शेयर भइरहेको छ । उक्त तस्बिरमा नेपाली सेनाले प्रदर्शनकारीतर्फ हतियार सोझ्याइरहेको र दुवै पक्षबिच करिब दुई मिटरको मात्र दूरी रहेको देखाइएको छ । यो तस्बिरलाई पूर्वसांसद एवं जनमत पार्टीका अध्यक्ष डा. सीके राउतले समेत आफ्नो सामाजिक सञ्जालमा पोस्ट गरेका छन् ।

तर, टेकपानाले गरेको तथ्यजाँचका क्रममा उक्त तस्बिर वास्तविक नभई एआई सिर्जित भएको पुष्टि भएको छ । ओपनएआईको प्राविधिक प्रणालीमार्फत गरिएको परीक्षणमा उक्त तस्बिरलाई एआई टुलको प्रयोग गरी परिमार्जन वा सिर्जना गरिएको प्राविधिक प्रमाण फेला परेको हो । त्यसैले सुनसरीमा सेना र प्रदर्शनकारीको दुरी दुई मिटरजति मात्र रहेको भन्दै फैलाइएको तस्बिर नक्कली हो ।