नेकपा सांसद विष्टको प्रश्न– आमसभा एकैदिन मात्र गर्ने वातावरण निर्माण गर्न सकिन्छ ?

काठमाडौँ । नेपाली कम्युनिस्ट पार्टी (नेकपा) का सांसद नरबहादुर विष्टले निर्वाचनलाई कम खर्चिलो बनाउन सबै दलका उम्मेदवारहरूले एउटै मञ्चबाट पालैपालो आफ्ना योजना सुनाउने वातावरण निर्माण गर्न निर्वाचन आयोगलाई सुझाव दिएका छन् । प्रस्तावित प्रमुख निर्वाचन आयुक्त मानबहादुर कार्कीको कार्ययोजनामाथि संसदीय सुनुवाइ समितिमा भएको छलफलमा बोल्दै सांसद विष्टले यस्तो प्रस्ताव अघि सारेका हुन् ।

निर्वाचनमा उम्मेदवारहरूले गर्ने फजुल खर्च र तामझाम घटाउने उपाय सुझाउँदै सांसद विष्टले भने– ‘निर्वाचनमा उम्मेदवारले गर्ने खर्च घटाउने तपाईंको के योजना छ ? एउटा यस्तो वातावरण बनाउन सकिन्छ कि सकिँदैन, जहाँ सबै पार्टीका उम्मेदवारहरूले एकै स्थानमा, एकै दिन मात्रै आमसभा गरेर जनताका बिचमा आफ्ना योजना र प्रतिवद्धताहरू राख्न सकुन् ?’