मंगलबहादुर शाही : मुगुको गाउँदेखि कर्णालीको मुख्यमन्त्रीसम्मको यात्रा

सुर्खेत । कर्णाली प्रदेशका नवनियुक्त मुख्यमन्त्री मंगलबहादुर शाही लामो राजनीतिक सङ्घर्ष, शिक्षण अनुभव र जनयुद्धको यात्राबाट प्रदेश सरकारको नेतृत्वमा पुगेका नेता हुन् । विद्यार्थी राजनीतिबाट सुरु भएको उनको राजनीतिक यात्रा शिक्षक, जनयुद्धका पूर्णकालीन कार्यकर्ता, पार्टी नेता हुँदै मुख्यमन्त्रीसम्म आइपुगेको छ ।

२०२५ साल भदौ १६ गते मुगुको सोरु गाउँपालिका-६, सोरुकोटमा जन्मिएका शाहीले प्राथमिक शिक्षा आफ्नै गाउँको सोरुकोट प्राथमिक विद्यालयबाट सुरु गरेका थिए । उनले २०४४ सालमा जुम्लाको चन्दननाथ माध्यमिक विद्यालयबाट एसएलसी उत्तीर्ण गरेपछि उच्च शिक्षाका लागि काठमाडौँ पुगे ।