दाङमा खाना पकाउने ग्यासको हाहाकार : उपभोक्ता हप्तौदेखि लाइनमा

दाङ : दाङमा पछिल्लो समय खाना पकाउने एलपी ग्यासको चरम अभाव देखिएको छ । एक महिना अघिसम्म आधा सिलिन्डर ग्यास पाइरहेका उपभोक्ताले अहिले त्यहि पनि पाउन सकेका छैनन् । सरकारले निर्णय गरेर केहि महिनादेखि आधा सिलिडर दिंदै आएकोमा अहिले त्यो पनि दिन सकेको छैन । आयल निगमले अब आधा हैन ‘पूरा सिलिन्डर’ दिने निर्णय गरे पनि खपत व्यवस्थापन गर्न सकेको छैन ।

अहिले बजारमा ग्यासको अभाव देखिएको छ । आधा सिलिन्डर पाइरहेका उपभोक्ताले अहिले झन ग्यास नै नपाउने अवस्थामा पुगेको उपभोक्ता गृष्मा शर्माले बताइन् । ‘अहिले त्यहि आधा पनि पाउन छाडेका छौं’, उनले भनिन्, ‘नाकाबन्दीको बेला भन्दा पनि अहिले बढी अभाव भएको छ ।’ ‘आधा सिलिन्डरको व्यवस्था हटाएर पूरा सिलिन्डर वितरण गर्ने निर्णय त भयो, तर त्यससँगै बजारमा ग्यासको आपूर्ति सहज हुन नसक्दा झनै हाहाकार मच्चिएको छ’, व्यवसायी राजेश चौधरीले भने, ‘हप्तामा १ दिन ४० -५० सिलिन्डर आउछ, माग दिनमै एक सय माथि छ ।’