यो वर्षको चुनावी अभियानबाट बोल्सोनारो प्रतिबन्धित, उनको एआई अवतारले गर्न सक्छ अभियान ?

ब्रासिलिया । ब्राजिलका पूर्वराष्ट्रपति जाइर बोल्सोनारो घरमै नजरबन्दमा रहेकाले सार्वजनिक रूपमा राजनीतिक गतिविधि गर्न प्रतिबन्धित छन् । तर कृत्रिम बुद्धिमत्ता (एआई) प्रविधिबाट तयार गरिएको उनको डिजिटल अवतारले शनिबार उनका छोरा फ्लाभियो बोल्सोनारोको राष्ट्रपति पदको चुनावी अभियान उद्घाटन समारोहमा सम्बोधन गरेपछि ब्राजिलमा नयाँ कानुनी र राजनीतिक बहस सुरु भएको छ ।

कार्यक्रममा प्रदर्शन गरिएको भिडियोको सुरुआतमै वक्ता एआईबाट सिर्जना गरिएको अवतार भएको जानकारी दिइएको थियो । त्यसपछि अवतारले बोल्सोनारोकै शैलीमा सन्देश दिँदै, “कुनै पनि जेलले हामीले जगाएको आशाको भावना दबाउन सक्दैन,” भनेको थियो । साथै, उनले आफ्नो स्थानमा फ्लाभियो बोल्सोनारोलाई समर्थन गर्न आग्रह गरेका थिए ।