पोखरा भित्रिएका पर्यटकलाई क्यूआर मार्फत सूचना

पोखरा घुम्न आएका स्वदेशी तथा विदेशी पर्यटकलाई सुरक्षित भ्रमण गराउने र पर्यटन क्षेत्रको जानकारी दिलाउने उद्देश्यले एकीकृत रुपमा सूचना प्रवाह गर्न थालिएको छ। त्यसका लागि क्यूआर कोड तयार पारिएको छ। उक्त क्यूआर कोडमार्फत पर्यटकले पोखराभित्र घुमघाम गर्दा आवश्यक पर्ने सूचना र सचेतनाबारे जानकारी पाउनेछन्।

पर्यटकले पोखरा भित्र घुमघाम गर्दा अपनाउनुपर्ने सजगताबारे पनि उक्त क्यूआर मार्फत जानकारी पाउनेछन। पर्यटकलाई सूचना दिलाउनका लागि गण्डकी प्रदेश प्रहरी कार्यालय र पोखरा पर्यटन परिषद्को संयुक्त पहलमा क्युआर कोड सञ्चालनमा ल्याइएको छ। क्युआर कोड स्क्यान गरेपछि स्वदेशी तथा विदेशी पर्यटकले पोखराभित्र रहेका प्रहरी चौकी र सम्पर्क नम्बर, पर्यटकीय सुरक्षा सम्बन्धी जानकारी, भ्रमणका सूचना सहजै प्राप्त गर्न सक्नेछन्।