मानबहादुर कार्की : न्याय प्रशासनका अनुभवीलाई निर्वाचन आयोगको नेतृत्व

१३ साउन, काठमाडौं । निर्वाचन आयोगको प्रमुख निर्वाचन आयुक्तमा मानबहादुर कार्कीको नाम संसदीय सुनुवाइ समितिले सर्वसम्मत रूपमा अनुमोदन गरेको छ । यो सँगै अब नेपालको एक प्रमुख संवैधानिक निकाय निर्वाचन आयोगको नेतृत्व कार्कीले सम्हाल्ने निश्चित भएको छ । उनीसँगै डा. राजीव सुब्बा र गुरु वाग्लेको नाम संसदीय सुनुवाइ समितिबाट सर्वसम्मत रूपमा अनुमोदन भएको छ ।

अब उनीहरूले औपचारिक रूपमा निर्वाचन आयोग हाँक्नेछन् । डा. राजीव सुब्बा नेपाल प्रहरीमा डीआईजी (प्रहरी नायब महानिरीक्षक) सम्मको जिम्मेवारीमा रहेर काम गरेका व्यक्ति हुन् । सूचनाप्रविधि क्षेत्रमा उच्च अध्ययन (पीएचडी) गरेका छन् । गुरु वाग्ले २५ वर्षसम्म निजामती सेवामा रहेर अवकाशप्राप्त व्यक्ति हुन् ।