‘फेरि बुद्ध जन्माइदेऊ’

सुनसरी देवानगन्जको कप्तानगन्जमा दुई समूहबिचको विवाद हिंसामा परिणत भएपछि उत्पन्न असहज परिस्थितिलाई साम्य पार्न बुधबार इटहरीमा सामाजिक सद्भाव र्‍याली निकालिएको छ। र्‍यालीमा सहभागीले ‘नेपालमा फेरि बुद्ध जन्माइदेऊ, हिंसा होइन, शान्ति चाहिन्छ, जातीय र सामाजिक एकता कायम गरौं’ भन्ने नारा लगाएका थिए। सामाजिक सद्भाव कायम गर्न नागरिक समाज इटहरीको अगुवाइमा र्‍याली निकालिएको हो।

इटहरीमा जबजब जातीय र धार्मिक सद्भाव बिथोलिन्छ तबतब सद्भाव र्‍याली हुने गरेको नागरिक समाजका पूर्वअध्यक्ष बद्रीविशाल पोखरेलले बताए। दुई वर्षअघि धरानमा धार्मिक विवादले उग्ररुप लिँदा इटहरीमा सद्भाव र्‍याली निकालिएको थियो। २०७२ सालमा पनि भारतले नेपालविरुद्द अघोषित नाकाबन्दी गर्दा नागरिक समाजकै अगुवाइमा सद्भाव र्‍याली निकालिएको थियो।