हुलाकको डिजिटल रूपान्तरण : अब राहदानीदेखि शैक्षिक प्रमाणपत्रसम्म घरमै

काठमाडौं । डिजिटल प्रविधिको तीव्र विकाससँगै परम्परागत हुलाक सेवाको स्वरूप परिवर्तन गर्दै सरकारले ‘स्मार्ट हुलाक’ कार्यक्रमलाई प्राथमिकताका साथ अघि बढाएको छ । हुलाक सेवालाई आधुनिक, प्रविधिमैत्री र बहुउद्देश्यीय सार्वजनिक सेवा केन्द्रका रूपमा विकास गर्ने लक्ष्यसहित देशभर चरणबद्ध रूपमा यसको विस्तार सुरु गरिएको हो ।

सरकारले सार्वजनिक गरेको शासकीय सुधारसम्बन्धी १०० दिने कार्ययोजनाअन्तर्गत राहदानी, नागरिकताको प्रतिलिपि, सवारी चालक अनुमतिपत्रलगायतका सरकारी कागजात नागरिकको घरमै पुर्‍याउने व्यवस्था गर्ने प्रतिबद्धता जनाएको थियो । चालु आर्थिक वर्षको नीति तथा कार्यक्रम तथा बजेटमार्फत पनि देशभरका हुलाक कार्यालयलाई क्रमश: स्मार्ट हुलाकमा रूपान्तरण गर्ने योजना अघि सारिएको छ ।