अमेरिकामा रगतको चरम अभाव

वाशिङटन डीसी । अमेरिकी रेड क्रसले अमेरिकामा रगतको मौज्दात अत्यन्त न्यून भएपछि ‘रक्त आपूर्ति संकट’ घोषणा गरेको छ । संस्थाको १५० वर्षको इतिहासमा यस्तो अवस्था दोस्रो पटक आएको हो । अमेरिकी रेड क्रसकी चिकित्सक कोर्टनी लरेन्सका अनुसार डढेलो, अत्यधिक गर्मी र अन्य आपत्कालीन अवस्थाले रक्तदानमा कमी ल्याएपछि संकट उत्पन्न भएको हो ।

गत महिना मात्र रगतको मौज्दात २५ प्रतिशतले घटेको बताइएको छ । यो संकट गर्मीयाममा देखिएको हो, जुन समयमा सडक दुर्घटना तथा बाहिरी गतिविधि बढ्ने भएकाले अस्पतालहरूमा रगतको आवश्यकता पनि सामान्यभन्दा धेरै हुन्छ । अमेरिकी रेड क्रसले हाल वर्षको यही समयमा हुने सामान्य वितरणभन्दा करिब ३ हजार ५०० युनिट बढी रगत अस्पतालहरूलाई उपलब्ध गराइरहेको जनाएको छ । संस्थाका अनुसार अहिले रगतको मौज्दात अत्यन्त न्यून स्तरमा पुगेको छ ।