किन गएका थिए नेकपा वरिष्ठ नेता खनाल चीन?

नेपाली कम्युनिष्ट पार्टीका वरिष्ठ नेता झलनाथ खनालले यही श्रावण ७ देखि १३ गतेसम्म चीनको सप्ताहव्यापी भ्रमण पूरा गरी बुधवार राति स्वदेश फर्किएका छन्। चीनमा रहँदा खनालले नेपाल–चीनबीचको मैत्रीपूर्ण सम्बन्ध र सहयोगका विषयमा विस्तृत रूपमा विचार र अनुभवहरूको आदान–प्रदान गरेका थिए।

उक्त द्विपक्षीय आदान–प्रदानको क्रममा चीनले सधैं नेपालको राष्ट्रिय स्वतन्त्रता, सार्वभौमिकता र भौगोलिक अखण्डताको पक्षमा रहेको, नेपालले आफ्नो विकास, निर्माण र रूपान्तरणको स्वतन्त्र बाटो पहिल्याएको देख्न चाहेको तथा नेपालको विकास प्रयासमा चीन कुनै पनि प्रकारको सहयोग गर्न तत्पर रहेको कुरा चिनियाँ पक्षले व्यक्त गरेको थियो। सो अवसरमा पूर्वप्रधानमन्त्री खनालले नेपाल सधैं ‘एक चीन नीति’ मा दृढ रहेको र नेपालको भूमि चीनविरुद्ध कसैले प्रयोग नगरोस् भन्नेतर्फ सचेत रहेको स्पष्ट पारेका थिए।