सिमसार जोगाउँदै स्थानीय

चितवनका स्थानीयहरू सिमसार संरक्षणमा जागरूक हुन थालेका छन्। रत्ननगर नगरपालिका–९ स्थित मिलिजुली मध्यवर्ती सामुदायिक वनका उपभोक्ताले दलदल र हिलो मात्रै रहेको ठाउँमा जैविक बाँध लगाएर सिमसार, पोखरी र ताल जोगाउन थालेका हुन्। कुमाल तालनजिक दुई हेक्टरभन्दा बढी क्षेत्रफलमा यसरी ताल निर्माण भएको छ। पहिले कान्छीघोलका नामले चिनिने दलदल र हिलो क्षेत्रमा अढाई मिटर अग्लो जैविक बाँध लगाएर पानी जम्मा गरी तालमा परिणत गरिएको हो।

सिमसारलाई स्थानीयस्तरमा घोल भन्ने चलन छ। पुनर्निर्माणपछि भने यसलाई मिलिजुली ताल नाम दिइएको छ। तालको सरदर गहिराइ डेढ मिटर छ। जैविक बाँध लगाउन स्थानीयले ढुंगा, माटो, बाँस र स्थानीय प्राकृतिक सामग्रीको प्रयोग गर्छन्।