अल्पमतमा परेका मुख्यमन्त्री बानियाँले विश्वासको मत लिने

बागमती प्रदेशका मुख्यमन्त्री इन्द्रबहादुर बानियाँले प्रदेशसभाबाट विश्वासको मत लिने भएका छन्। सत्ता साझेदार नेकपा (एमाले) ले सरकारलाई दिएको समर्थन फिर्ता लिएपछि अल्पमतमा परेका मुख्यमन्त्री बानियाँले विश्वासको मतमार्फत सरकारको निरन्तरता खोज्ने निर्णय गरेका हुन्।

नेपाली कांग्रेस बागमती प्रदेश संसदीय दलको बिहीबार ललितपुरमा बसेको बैठकले मुख्यमन्त्री बानियाँलाई विश्वासको मत लिने निर्णय गर्दै सरकारलाई आवश्यक समर्थन जुटाउन अन्य राजनीतिक दलसँग संवाद र समन्वय अघि बढाउने जिम्मेवारी पनि दिएको छ।