जाडो बिदामा विद्यार्थीका लागि फूटबल सिक्न ‘विन्टर क्याम्प’

काभ्रे — बनेपा फूटबल एकेडेमीले फूटबल सिक्न चाहने बालबालिकाका लागि विन्टर क्याम्प सञ्चालन गर्ने भएको छ । विद्यालयहरुमा जाडो बिदा हुने समय पारेर यही पुस १९ गतेदेखि १५ दिने क्याम्प सञ्चालन गर्न लागिएको शनिबार आयोजित पत्रकार सम्मेलनमा जानकारी दिइयो ।

एकेडेमीका अध्यक्ष निरोज शाक्यले बिदाको समयमा विद्यार्थीहरू खाली बस्ने हुँदा कुलतमा नलागून् र खेलप्रति आकर्षण बढोस् भन्ने उद्देश्यले क्याम्प सञ्चालन गर्न लागिएको बताए । क्याम्पमा ८ वर्षदेखि १६ वर्ष उमेर समूहका बालबालिकाले सहभागिता जनाउन पाउनेछन् । क्याम्पमा सहभागी हुन १५ सय रुपैयाँ शुल्क तोकिएको छ ।