साढे ३ किमि सडक बनाउन १० वर्ष!

बुटवलको मुख्य बजार क्षेत्र हुँदै जाने सिद्धार्थ राजमार्गअन्तर्गत राजमार्ग चौराहदेखि गोलपार्कसम्मको साढे ३ किलोमिटर सडक विस्तार सुरु भएको एक दशक बितिसक्दा पनि निर्माण सम्पन्न हुन सकेको छैन। दुईपटक ठेक्का सम्झौता, सातपटक म्याद थप र लागत वृद्धि हुँदासमेत आयोजनाको भौतिक प्रगति करिब ६२ प्रतिशत मात्रै पुगेको छ।

यो सडक २०७३ चैतमा कञ्चनजंघा–बिरुवा जेभीसँग २०७६ भित्र सम्पन्न गर्ने लक्ष्यसहित ५३ करोड ९७ लाख ९९ हजार रुपैयाँमा ठेक्का सम्झौता गरिएको थियो। प्रारम्भिक लागत अनुमान करिब ५६ करोड रुपैयाँ रहेकामा अहिले लागत बढेर ६२ करोड रुपैयाँ पुगेको छ।