अयोध्यासँग जोडिएपछि सेतीवेनीमा बढ्यो धार्मिक पर्यटन

स्याङ्जा । स्याङ्जा, पर्वत र गुल्मी जिल्लाको सङ्गमस्थलका रुपमा परिचित सेतीवेनी पछिल्लो समय धार्मिक तथा पर्यटकीय दृष्टिले थप महत्वपूर्ण गन्तव्यका रुपमा स्थापित हुँदै गएको छ । कालीगण्डकी नदीबाट शालिग्राम शिला भारतको अयोध्यामा लगेर भगवान् श्रीरामको मन्दिरमा प्राणप्रतिष्ठा गरिएपछि सेतीवेनीस्थित शिलाको दर्शन गर्न आउने भक्तजन तथा पर्यटकको संख्या उल्लेख्यरुपमा वृद्धि भएको स्थानीयले बताएका छन् ।

वि.सं. २०७९ मा म्याग्दीको गलेश्वरधामस्थित कालीगण्डकी नदीबाट लगिएको शालिग्राम शिला अयोध्यामा प्राणप्रतिष्ठा गरिएसँगै नेपालका धार्मिक स्थलप्रति भारतीय श्रद्धालुको आकर्षण अझ बढेको हो । यसकै प्रभावस्वरुप सेतीवेनीमा शिलादर्शन गर्ने र त्यसपछि मुक्तिनाथ जाने तीर्थयात्रीको चहलपहल बढ्दै गएको पण्डित केशवराज न्यौपानेले जानकारी दिनुभयो ।