मनसुनजन्य जाेखिम: उच्च सतर्क अवस्थामा मधेस सरकार

मधेस प्रदेशमा विपद् न्यूनीकरण तथा व्यवस्थापनका लागि तीव्रताका साथ पूर्वतयारी थालिएको छ। विगतमा अन्तिम समयमा मात्रै तयारी गर्दा बाढी तथा डुबानको जोखिम बढेको निष्कर्ष निकाल्दै मधेस प्रदेश सरकारले यो वर्ष समयमै तयारी थालेको छ। प्रदेश विपद् व्यवस्थापन कार्यकारी समितिले जोखिम न्यूनीकरण, उद्धार, राहत तथा समन्वयका विविध निर्णय गर्दै सबै निकायलाई उच्च सतर्कतामा रहन निर्देशन दिइसकेको छ। जल तथा मौसम विज्ञान विभाग तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणको चेतावनीलाई आधार मान्दै प्रदेश सरकारले नदीकिनार, डुबान तथा पहिरो प्रभावित क्षेत्रहरूमा विशेष निगरानी बढाउने निर्णय गरेको छ। जोखिमयुक्त बस्तीमा स्थानीय तह, सुरक्षा निकाय तथा स्वयंसेवक परिचालन गरी तत्काल सतर्कता अपनाउन आग्रह गरिएको छ।

मधेस सरकारले पानी, विद्युत्, सञ्चार, यातायात, स्वास्थ्यजस्ता अत्यावश्यक सेवा अवरुद्ध हुन नदिन सम्बन्धित निकायलाई तयारी अवस्थामा राखेको छ। सम्भावित प्रभावित परिवारलाई सुरक्षित स्थानमा सार्न सार्वजनिक भवन, विद्यालय, सामुदायिक भवन तथा धर्मशालालाई अस्थायी आश्रयस्थलका रूपमा प्रयोग गर्ने व्यवस्था मिलाउन स्थानीय तहलाई निर्देशन दिइएको छ। कमला, बागमती, लालबकैया, लखनदेही, मनुषमारा, झाँझलगायत नदीहरूको जलसतहमा निरन्तर निगरानी राख्न सम्बन्धित निकायलाई जिम्मेवारी दिइएको छ। साथै जोखिमयुक्त क्षेत्रका नागरिकलाई रेडियो, टेलिभिजन, पत्रपत्रिका तथा सामाजिक सञ्जालमार्फत जनचेतनामूलक सूचना प्रवाह गरी सचेतना फैलाउन तयारी भएको प्रदेश विपद् व्यवस्थापन कार्यकारी समितिको भनाइ छ। मोबाइल अलर्ट सन्देश र रिङब्याक टोनमार्फत समेत जनचेतना अभिवृद्धि गर्ने तयारी गरिएको छ।