ब्रोड पिक हिमपहिरो : मृतक चारमध्ये दुई जनाको पहिचान खुल्यो

पाकिस्तानको ब्रोड पिक हिमालमा गएको हिमपहिरोमा परी बेपत्ता भएका आरोहीहरूको खोजीका क्रममा चार जनाको शव फेला परेको छ। तीमध्ये दुई जनाको पहिचान खुलेको जनाइएको छ।

अल्पाइन क्लब अफ पाकिस्तान (एसीपी) का अध्यक्ष मेजर जनरल इरफान अर्शदले दुई जनाको पहिचान ओमानकी नाधिरा अहमद अब्दुल्लाह अल हार्थी र नेपालका पुरबहादुर गुरुङको रूपमा भएको जानकारी दिएको पाकिस्तानस्थित डन अखबारले जानकारी दिएको छ। एसीपीका अनुसार ब्रोड पिकमा हिमपहिरो गएपछि प्रसिद्ध नेपाली पर्वतारोही निर्मल पुर्जा र पाकिस्तानी पर्वतारोही सोहेल सखीसहित १० जनाको टोली बेपत्ता भएको थियो। बेपत्ता हुने १० सदस्यीय टोलीमा ६ जना नेपाली पर्वतारोही, एक पाकिस्तानी, एक ओमानी, एक अमेरिकी र चीनका एक पर्वतारोही रहेका छन्।