तार व्यवस्थापन गर्न आइस्पानले माग्यो थप १५ दिनको समय, मन्त्रालयले भन्यो– ‘यो अन्तिम पटक हो’

इन्टरनेट सेवा प्रदायक संघ नेपाल (आइस्पान) ले तार व्यवस्थापनका लागि अन्तिम पटक थप १५ दिनको समय मागेको छ । काठमाडौं उपत्यकामा वर्षौंदेखि पोलमा गुजुल्टिएर लत्रिएका तथा प्रयोगविहीन इन्टरनेट, टेलिफोन र केवलका तार व्यवस्थापन गर्न सरकारले दबाब दिएको थियो । तर, तोकिएको समयसीमाभित्र काम सम्पन्न गर्न नसकेपछि आइस्पानले थप समय मागेको हो ।

शुक्रबार सूचना तथा सञ्चार मन्त्रालयमा बसेको सरोकारवाला निकायहरूको बैठकमा आइस्पानले काम सम्पन्न गर्न थप समय आवश्यक रहेको जानकारी दिएको छ । बैठकमा सूचना तथा सञ्चार मन्त्रालय, ऊर्जा, जलस्रोत तथा सिँचाइ मन्त्रालय, नेपाल दूरसञ्चार प्राधिकरण, नेपाल टेलिकम, आइस्पान तथा अन्य सम्बन्धित निकायका प्रतिनिधिहरूको सहभागिता रहेको थियो ।