दक्षिणपश्चिम फ्रान्समा डढेलो नियन्त्रणको अन्तिम प्रयास

दक्षिणपश्चिम फ्रान्समा हजारौँ मानिसलाई विस्थापित गराएको भीषण डढेलो धेरै दिनदेखि थप नफैलिएपछि अग्निनियन्त्रक अहिले बाँकी रहेका आगोका सक्रिय विन्दु (हटस्पट) पूर्णरूपमा नियन्त्रणमा लिन केन्द्रित भएका छन् ।

अधिकारीले मौसममा आएको अनुकूल परिवर्तनले नियन्त्रण अभियानलाई सहज बनाएको बताएका छन् । बोर्डो नजिकैको गिरोन्द क्षेत्रको एटलान्टिक तटीय भागमा लागेको डढेलोले हालसम्म करिब ४२ हजार हेक्टर पाइन वन तथा पर्यटकीय क्षेत्र नष्ट गरिसकेको छ । आगोले जलेको क्षेत्रफल पेरिस सहरको क्षेत्रफलभन्दा करिब चार गुणा ठूलो रहेको जनाइएको छ ।