प्रशासनिक अन्योलले रोकियो रौतहटका तीन पालिकाको बजेट

नयाँ आर्थिक वर्ष सुरु हुन केही दिन मात्र बाँकी रहँदा रौतहटका तीन पालिकाको बजेट अझै अन्योलमा परेको छ। जिल्लाका कटहरिया नगरपालिका, गरुडा नगरपालिका र फतुवा विजयपुर नगरपालिकामा नगरसभा हुन नसक्दा आगामी आर्थिक वर्ष २०८३÷८४ को नीति, कार्यक्रम तथा बजेट पारित हुन सकेको छैन।

संविधान तथा स्थानीय सरकार सञ्चालन ऐनअनुसार स्थानीय तहले असार १० भित्र आगामी आर्थिक वर्षको नीति तथा कार्यक्रम तथा असार मसान्तभित्र बजेट पारित गरिसक्नुपर्ने व्यवस्था छ, तर ती पालिकामा देखिएको राजनीतिक विवाद, दलगत खिचातानी र जनप्रतिनिधिबिचको असमझदारीका कारण नगरसभा हुन सकेकोे छैन। नगरसभा नहुँदा विकास निर्माणका योजना, चालु कार्यक्रम तथा नयाँ आर्थिक वर्षका लागि आवश्यक बजेट व्यवस्थापन प्रभावित हुने देखिएको छ। समयमै बजेट पारित हुन नसके स्थानीय तहका नियमित प्रशासनिक तथा विकाससम्बन्धी गतिविधिमा समेत असर पर्ने चिन्ता बढेको छ।