संसदमा प्रधानमन्त्री

यतिबेला मुलुक प्रधानमन्त्री बालेन्द्र शाहले संसद्मा बोलेको सुन्न चाहिरहेको छ । संसद् बैठकमा सांसदहरूले गरेको मागबाट यो झल्किन्छ । प्रधानमन्त्रीले संसद्मा बोल्नुपर्छ वा पर्दैन भन्ने तर्क गर्न सकिएला । प्रधानमन्त्री संसद्प्रति मन्त्रिपरिषद् र आफ्नो तर्फबाट जवाफदेही हुन्छन् । आफैंले निर्वाचित गर्ने संसद्लाई प्रधानमन्त्रीले बेवास्ता गर्ने अवस्था रहँदैन । प्रधानमन्त्रीले संसद्मा दिएका अभिव्यक्तिबाट मुलुकभरिका सर्वसाधारणले यथार्थ बुझ्न कोसिस गर्छन्।

यसै पनि प्रधानमन्त्री हुनु भनेको कसैप्रति जवाफदेही नहुने भन्ने होइन । मुलुकको कार्यकारी प्रमुख भइसकेपछि संसद्लाई मात्र होइन, प्रेस र अन्य माध्यमबाट पनि आफ्ना अभिव्यक्तिहरू सार्वजनिक गर्नुपर्ने दायित्व हुन्छ । यसले प्रधानमन्त्रीका काम र गतिविधि बुझ्न सहज हुन्छ । हिजो प्रधानमन्त्रीहरू संसद्मा गएर बोल्थे, त्योभन्दा धेरै संसद्बाहिर तिनको अभिव्यक्ति सुनिन्थ्यो । तिनले पनि संसद्मा नबोलेर बाहिर बोलेकोमा बेलाबेलामा आलोचना हुने गरेको थियो । विशेष गरी संसद् अधिवेशन चलेका बेला महत्त्वपूर्ण घोषणा वा निर्णय त्यहीं सुनाउनुपर्छ भन्ने मान्यता रहन्छ।