वित्तीय अपराधमा व्यवसायी: मुद्दा फितलो कि पहुँचको खेल?

धितोपत्र कारोबार तथा सम्पत्ति शुद्धीकरणसम्बन्धी आरोपमा पक्राउ गरी मुद्दा चलाइएका व्यवसायी दीपक भट्ट, शेखर गोल्छा, शंकर ग्रुपसँग जोडिएको अग्रवाल परिवार, विभिन्न कर्पोरेट घरानाका साझेदारहरू अदालतको आदेशमा धरौटीमा थुनामुक्त भइरहेका छन्। आरोपित थुनामुक्त हुँदा मुद्दा कमजोर कि पहुँचको खेल भन्ने प्रश्न उठाएको छ। अर्कोतर्फ आवश्यक प्रमाण नजुटाईकन हतारमा काम देखाउन सिआइबी, सम्पत्ति शुद्धीकरण अनुसन्धान विभाग र सरकारी वकिलको कार्यालयले व्यवसायीमाथि मुद्दा लगाएको टिप्पणी पनि भइरहेको छ।

अदृश्य रूपमा प्रधानमन्त्री बालेन्द्र शाहलगायत सरकारमा रहेका व्यक्तिहरूसँग जोडिएर थुनामुक्त हुन अनेक प्रयास गरिरहेका चर्चित व्यवसायी भट्टले केही दिनअघि दायर गरेको निवेदनमा सर्वोच्च अदालतले उनलाई थुनामुक्त गराउन कैफियत प्रतिवेदन माग गरेको र सोही मुद्दामा जेल परेका अर्का व्यवसायी शेखर गोल्छा एक करोड रुपैयाँ धरौटीमा जिल्ला अदालत काठमाडौंको आदेशबाट रिहा भएका छन्। यो प्रकरणका मुख्य अभियुक्त भट्ट अर्बौं रुपैयाँको शंकास्पद वित्तीय कारोबार, बैंकिङ कसुर र सम्पत्ति शुद्धीकरणको गम्भीर अभियोगमा थुनामा छन्। भट्ट इन्फिनिटी होल्डिङ्सका अध्यक्ष हुन्। नेपाल प्रहरीको केन्द्रीय अनुसन्धान ब्युरो (सिआइबी) र सम्पत्ति शुद्धीकरण अनुसन्धान विभागले गरेको संयुक्त अनुसन्धानका क्रममा भट्टसहित दर्जनौं व्यवसायी तथा सेयर ब्रोकरहरूको नेटवर्क यो प्रकरणमा मुछिएका छन्।