प्रदेश सरकारको कार्यक्रमले त्रिपुरासुन्दरीमा व्यावसायिक भैंसीपालन फस्टाउँदै

धादिङ : धादिङको त्रिपुरासुन्दरी गाउँपालिका-७ मा सञ्चालन भइरहेको बागमती प्रदेश सरकारको ‘एक वडा-एक कृषि उत्पादन’ कार्यक्रमले स्थानीय किसानलाई व्यावसायिक भैंसीपालनतर्फ आकर्षित गर्दै ग्रामीण अर्थतन्त्रलाई नयाँ गति दिएको छ। अनुदान, प्रविधि, तालिम र बीमासहितको एकीकृत सहयोगका कारण किसानको आम्दानी वृद्धि, दूध उत्पादन विस्तार तथा गाउँमै रोजगारी सिर्जनामा कार्यक्रम प्रभावकारी बन्दै गएको छ।

पशु सेवा कार्यालय धादिङ र त्रिपुरेश्वर भैंसी प्रवर्द्धन कृषक समूहको साझेदारीमा सञ्चालित कार्यक्रमअन्तर्गत खहरे, लपाङ, अचनेटार र सिउरेनीका २२ घरधुरीलाई समेटिएको छ। हालसम्म २१ घरधुरीले भैंसी प्राप्त गरिसकेका छन्। तीमध्ये चार परिवारलाई दुई-दुई वटा र १७ परिवारलाई एक-एक वटा भैंसी वितरण गरिएको छ। साथै पशुपालनलाई सहज बनाउन एक थान मिल, ११ वटा च्याप कटरलगायत आवश्यक उपकरण पनि उपलब्ध गराइएको छ।