बारामा सार्वजनिक भिडियोले तस्करी र घुसको आरोपबारे उठायो प्रश्न, सशस्त्रद्वारा छानबिन सुरु

बाराको एक सीमा नाकामा भारतीय नागरिक र सशस्त्र प्रहरीका एक असईबीच भएको भनिएको विवादको भिडियो सार्वजनिक भएपछि घटनाबारे सशस्त्र प्रहरीले आन्तरिक छानबिन सुरु गरेको जनाएको छ।

सार्वजनिक भिडियोमा भारतको बिहार राज्यको आदापुर थाना अन्तर्गत बेल्दारवा इनर्वा निवासी मनान मियाँ नाम गरेका व्यक्तिले सशस्त्र प्रहरीका असई केशव रानासँग विवाद गर्दै तस्करीका लागि ‘लाइन’ खुलाइदिन भन्दै हवल्दारमार्फत एक लाख रुपैयाँ दिएको दाबी गरेका छन्। उनले आफूले उक्त रकम व्यापारीसँग ऋण लिएर दिएको र रकम बुझाए पनि काम हुन नसकेको गुनासो गरेको भिडियोमा सुनिन्छ।