मिस नेपाल वर्ल्ड – २०२६ को ताज दीपमालाको शिरमा : आमाको अधुरो सपना तीन दशकपछि पूरा

काठमाडौँ- मिस नेपाल वर्ल्ड- २०२६ को ताज घोषणा हुनुअघि हलमा एकाएक निस्तब्धता छायो। हलको उज्यालो तीन प्रतिस्पर्धी युवतीमाथि केन्द्रित थियो। उनीहरूका अनुहारमा मुस्कान थियो, तर त्यो मुस्कानभित्र महिनौँको मिहिनेत, वर्षौँको सपना र केही सेकेन्डपछि जीवन बदलिन सक्ने प्रतीक्षा लुकेको थियो। अनि उद्घोषकको स्वर गुञ्जियो– ‘मिस नेपाल वर्ल्ड २०२६– दिपमाला ढकाल।’

अन्तिम २४ हुँदै तीन जनामा आइपुग्दा हलमा एक दुई तीन को हुने भन्नेले सन्नाटा थियो भने केही क्षणमा दर्शक दिर्घाबाट दीपमाला दीपमाला कतै अन्य नामहरु आइरहेका थिए। तर मञ्चमा आउने नाम नै अन्तिम हुने थियो २०२६ को लागि। त्यो नाम थियो– दिपमाला। यस वर्षको प्रतियोगितामा आर्या निशान्त मिस नेपाल इन्टरनेसनल र कशिश सुब्बा मिस नेपाल कस्मो घोषित भइन्। विजेताहरूले नेपाललाई सम्बन्धित अन्तर्राष्ट्रिय प्रतियोगिताहरूमा प्रतिनिधित्व गर्नेछन्।