आमा जीवित रहेको ठोस प्रमाण देखाउन सैन्य सरकारलाई सुकीका छोराको चुनौती

काठमाडौँ । म्यानमारकी बन्दी प्रजातन्त्रवादी नेतृ आङ सान सुकीका कान्छा छोरा किम एरिसले सैन्य सरकार (जुन्ता) लाई आफ्नी आमा जीवितै रहेको ठोस प्रमाण सार्वजनिक गर्न आग्रह गरेका छन्। गत अप्रिलमा सुकीलाई जेलबाट नजरबन्द (आवासीय गृह) मा सारिएको भन्ने जुन्ताको दाबीप्रति गम्भीर शङ्का व्यक्त गर्दै उनले सुकी अझै पनि राजधानी नेपिडोस्थित जेलमै कष्टकर जीवन बिताइरहेको आफ्नो विश्वास रहेको बताएका छन्।

लन्डनमा क्योदो न्युजसँगको अन्तर्वार्ताका क्रममा एरिसले सैन्य सरकारको दाबीलाई पुष्टि गर्ने कुनै पनि आधार नभएको स्पष्ट पारे। उनका अनुसार हालसम्म बाहिर आएको एकमात्र आधिकारिक र भरपर्दो जानकारी भनेको ७९ वर्षीया सुकीको स्वास्थ्य अवस्था लगातार बिग्रँदै गएको भन्ने मात्र हो।