ऊर्जा क्षेत्रमा सुधारको खाँचो, नीतिगत अवरोध हटाउन मन्त्रालय सक्रिय; वित्तीय प्रगति ६२ प्रतिशत

काठमाडौं । ऊर्जा, जलस्रोत तथा सिँचाइ मन्त्री विराज भक्त श्रेष्ठले ऊर्जा तथा जलस्रोत क्षेत्रको विकासमा आयोजना निर्माणभन्दा बाहिर रहेका नीतिगत र प्रक्रियागत अवरोध नै सबैभन्दा ठूलो चुनौती रहेको बताएका छन्। उनले जग्गा अधिग्रहण, मुआब्जा व्यवस्थापन, स्रोत सुनिश्चितता, अन्तरनिकाय समन्वय र ठेक्का व्यवस्थापनमा सुधार नगरी अपेक्षित परिणाम हासिल गर्न कठिन हुने बताए।

आर्थिक वर्ष २०८२/८३ को चौथो त्रैमासिक तथा वार्षिक प्रगति समीक्षा एवं मन्त्रालयस्तरीय विकास समस्या समाधान समितिको बैठकलाई सम्बोधन गर्दै मन्त्री श्रेष्ठले आयोजना कार्यान्वयनमा देखिएका संरचनागत समस्याको समाधानलाई मन्त्रालयले प्राथमिकतामा राखेको बताए।