भारतबाट बढेर आयो पेट्रोलियम पदार्थको मूल्य

भारतबाट नयाँ खरिद मूल्य प्राप्त भएको दुई दिन बितिसक्दा पनि नेपाल आयल निगमले पेट्रोलियम पदार्थको नयाँ खुद्रा मूल्य सार्वजनिक गरेको छैन। निगमका अनुसार यसपटक मूल्यमा उल्लेख्य परिवर्तन भएकाले सञ्चालक समितिको निर्णयपछि मात्र नयाँ मूल्य लागू गरिनेछ।

नेपाल आयल निगमले सामान्यतया हरेक अङ्ग्रेजी महिनाको १ र १६ तारिखमा पेट्रोल, डिजेल, मट्टितेल, हवाई इन्धन र एलपी ग्यासको मूल्य समायोजन गर्दै आएको छ। यसको आधार भारतको इन्डियन आयल कर्पोरेसन (आईओसी)बाट प्रत्येक महिनाको अन्तिम दिन र १५ तारिखमा प्राप्त हुने नयाँ खरिद मूल्य हो। यसपटक पनि नयाँ मूल्य शुक्रबार प्राप्त भए पनि निगमले हालसम्म संशोधित मूल्यसूची सार्वजनिक गरेको छैन।