नेपालमा मोरक्कोको राष्ट्रिय दिवस मनाइयो, सांस्कृतिक प्रदर्शनीदेखि पर्यटन प्रवर्द्धनसम्मका कार्यक्रम

काठमाडौं– मोरक्कोका महामहिम राजा मोहम्मद छैटौँको २७औँ राजगद्दी आरोहण दिवस (राष्ट्रिय दिवस)को अवसरमा नेपालस्थित मोरक्को अधिराज्यका लागि महावाणिज्यदूतको कार्यालयले आइतबार काठमाडौंमा विशेष समारोह तथा विविध कार्यक्रम आयोजना गरेको छ।

कार्यक्रमको शुभारम्भ थापाथलीस्थित महावाणिज्यदूतको कार्यालयमा आयोजित झण्डोत्तोलन समारोहबाट गरिएको थियो। नेपालका लागि मोरक्कोका राजदूत मोहम्मद मलिकी र नेपालका लागि मोरक्को अधिराज्यका महावाणिज्यदूत मेघा चौधरीले राष्ट्रिय झण्डा फहराउँदै कार्यक्रम उद्घाटन गरेका थिए । सो अवसरमा नेपाल र मोरक्को दुवै देशको राष्ट्रिय गान प्रस्तुत गरिएको थियो।