ललितपुर शिक्षक महासंघमा विवाद, भागबन्डा नमिलेपछि नेकपा निकट शिक्षकले च्याते माइन्युट

काठमाडौँ- ललितपुरमा नेपाल शिक्षक महासंघ गठनको विषयलाई लिएर आबद्ध शिक्षक संगठनबीच विवाद चुलिएको छ। महासंघ गठन प्रक्रियामा सहमति जुट्न नसकेपछि एक पक्षले वार्ताको माइन्युट च्यातेर हिँडेको छ भने अर्को पक्षले दुई संगठनले एकलौटी रूपमा महासंघ गठन गरेको भन्दै त्यसको वैधानिकतामाथि प्रश्न उठाएको छ।

नेपाल शिक्षक संघ, ललितपुरका जिल्ला अध्यक्ष सुरेश घिमिरेले महासंघ गठनअघि सबै आबद्ध संगठनबीच पटकपटक छलफल भएको बताए। उनका अनुसार महासंघ गठनका लागि नेपाल शिक्षक संघ, नेपाल राष्ट्रिय शिक्षक संगठन, नेपाल शिक्षक संगठन, संस्थागत विद्यालय शिक्षक युनियन, नेपाल विद्यालय कर्मचारी परिषद् लगायतका घटक संस्थाबीच १० पटकसम्म बैठक बसेको थियो।