ट्रम्पका ज्वाइँ जोडिएको विवादित योजनाबाट पछि हटे फिफा अध्यक्ष इन्फान्टिनो

फिफा अध्यक्ष जियानी इन्फान्टिनोले फुटबल जगतका सबै क्षेत्रबाट चर्को विरोध र दबाब झेलेपछि विश्वकपको नाफा निजी स्वामित्वमा बेच्ने आफ्नो विभाजनकारी योजनाबाट पछि हटेका छन्।

चौतर्फी आलोचना, युरोपेली निकायको बहिष्कारको चेतावनी र आफ्नै वरिष्ठ अधिकारीहरूको राजीनामा आएपछि उनले उक्त निर्णयबाट पछि हट्ने घोषणा गरेका हुन्। इन्फान्टिनोले फिफाका व्यावसायिक व्यवसायहरू र विश्वकप प्रतियोगिताहरूलाई २० अर्ब डलरको सहायक कम्पनीमा रूपान्तरण गरी त्यसको २० प्रतिशत हिस्सा अमेरिकी राष्ट्रपति डोनाल्ड ट्रम्पका ज्वाइँ जारेड कुशनरका भाइ जोशुआ कुसनरको लगानी फर्मलगायत निजी लगानीकर्तालाई बिक्री गर्ने प्रस्ताव राखेका थिए। तर, मंगलबार सार्वजनिक भएको उक्त घोषणापछि हरेक दिन यसको विरोध बढ्दै गएको थियो।