शरीरभन्दा पहिले मन किन थाक्दैछ ?

हामी यस्तो समयबाट गुज्रिरहेका छौँ, जहाँ मानिसको औसत आयु बढिरहेको छ, प्रविधि तीव्र गतिमा विकसित भइरहेको छ र जीवनका सुविधा दिनप्रतिदिन विस्तार हुँदैछन्। तर, विडम्बना के छ भने बाह्यरूपमा जीवन सहज र व्यवस्थित देखिए पनि मानिसको मन भने झन् संकुचित, थकित र अशान्त बन्दै गएको छ। अनुहारमा मुस्कान छ, सामाजिक सञ्जालमा खुसीका तस्बिरहरू हुन्छन्, सफलता र सम्पन्नताका कथा सुनिन्छन्। तर, ती चम्किला दृश्यहरूको पछाडि कतिपय मनहरू निस्सासिँदै छन्, मौनरूपमा चिच्याइरहेका छन्।

आजको सबैभन्दा ठूलो महामारी शरीरमा देखिने रोग मात्र होइन, धेरै अवस्थामा त्यो मानिसको मनभित्र मौनरूपमा फैलिरहेको मानसिक थकान हो। शरीर थाक्दा विश्रामले निको पार्न सक्छ, औषधिले पनि सहयोग गर्न सक्छ। तर, मन थाकेपछि मानिस आफैंसँग टाढिँदै जान्छ। ऊ आफ्नो अस्तित्वमाथि नै प्रश्न गर्न थाल्छ। जीवनको अर्थ हराउन थाल्छ। यही कारण मानसिक स्वास्थ्य आज चिकित्सकीय विषय मात्र होइन, यो सामाजिक न्याय, आर्थिक संरचना, पारिवारिक सम्बन्ध, नैतिक मूल्य, सांस्कृतिक परिवर्तन र मानवीय अस्तित्वसँग गाँसिएको गम्भीर सार्वजनिक सरोकारको विषय पनि बनेको छ।