सांघाई अटो एक्स्पोमा सहभागी हुन गण्डकीका २२ सहित ३० मेकानिक चीन जाँदै

चीनको सांघाईमा हुने अटो एक्स्पोमा सहभागी हुन नेपालबाट ३० जनाको टोली जाने भएको छ। चार दिनसम्म सञ्चालन हुने एक्स्पोमा अटो क्षेत्रमा आएको आमूल परिवर्तनलाई नजिकबाट नियाल्न तथा मर्मतसम्भारसम्बन्धी तालिम लिन पोखराका २२ जनासहित देशभरका ३० जना अटो मेकानिक सोमबार त्यसतर्फ प्रस्थान गर्न लागेका हुन्।

एपेस सोर्सिङ एन्ड म्याचिङ कन्फरेन्स–२०२६ को निमन्त्रणामा आयोजना हुने एक्स्पोको म्याचिङ सेसनमा सहभागी हुन नेपाल अटो मेकानिक्स व्यवसायी महासंघको नेतृत्वमा टोली चीन जान लागेको हो। ८० देशका प्रतिनिधि सहभागी हुने उक्त एक्स्पोमा १ हजार ७ सय ८५ वटा अटो कम्पनी सहभागी हुने दाबी गरिएको छ।