पाँच महिनापछि त्रिवि शिक्षण अस्पतालमा स्वास्थ्य बीमा सेवा पुनः सुरु

त्रिवि शिक्षण अस्पतालले पाँच महिनादेखि बन्द रहेको स्वास्थ्य बीमा सेवा सोमबारदेखि पुनः सुरु गर्ने भएको छ। अस्पतालका अनुसार हालका लागि बीमा अन्तर्गतको बहिरङ्ग(ओपिडी) सेवा मात्र उपलब्ध हुनेछ।

स्वास्थ्य बीमा बोर्डले अस्पताललाई बुझाउन बाँकी रहेको उपचारबापतको रकम भुक्तानी प्रक्रिया अगाडि बढाएपछि यो सेवा पुनः सञ्चालन गर्ने निर्णय गरिएको हो। यसअघि बोर्डबाट करिब ४० करोड रुपैयाँ दाबी भुक्तानी नपाएपछि आर्थिक संकटका कारण अस्पतालले गत माघ १ गतेदेखि स्वास्थ्य बीमा सेवा पूर्ण रूपमा स्थगित गरेको थियो।