ग्यासको फेरि सकस

बजारमा खाना पकाउने एलपी ग्यास पाउन उपभोक्तालाई सकस भएको छ । गत फागुनमा ग्यासको यस्तै अभाव भोगेका उपभोक्ताले अहिले आएर फेरि अभाव खेप्नु परेको छ । नेपाल आयल निगमले कोटा अनुसार ग्यासको आयात नियमित भइरहेको बताए पनि उपभोक्ताले एक सातादेखि पाउन सकेका छैनन् । ग्यास नपाएपछि डिलरमा उपभोक्ताको लाइन लागेको छ । बजारमा विशेष गरी नेपाल, एचपी, गीतालगायतका ग्यास सिलिन्डरको बढी अभाव छ । निगमसँग ग्यासको भण्डारण क्षमता नभएको र निजी क्षेत्रलाई ग्यासको कारोबार खुला गर्दा बेला बेला यस्तो समस्या आउने गरेको छ । निगमले खरिद आदेश (पिडिओ) जारी गर्ने र विभिन्न उद्योगीले भारतका विभिन्न रिफाइनरी केन्द्रबाट ग्यास आयात गर्छन् ।

ग्यास अभाव हुँदा गत २८ फागुनदेखि आधा तौलका सिलिन्डर वितरण गर्दै आएको निगमले ३० असारदेखि पूर्ण तौल (१४.२ केजी) भएका सिलिन्डर बजारमा बिक्री खुला गरेको थियो । निगमका प्रवक्ता मनोजकुमार ठाकुरले पूर्ण तौलको ग्यास सिलिन्डर बिक्री खुला गरेसँगै बजारमा खाली सिलिन्डर भर्ने ग्राहक धेरै आउँदा ग्यासको माग बढी भएको दाबी गर्नुभयो । ग्यासको आयात नियमित रूपमा भइरहेको तर माग बढेकाले अभाव देखिएको उहाँले जानकारी दिनुभयो । ग्यासको आयात नियमित भइरहेकाले आवश्यकताभन्दा बढी ग्यास खरिद नगर्न उहाँले उपभोक्तालाई आग्रह गर्नुभयो ।