मन्त्रीका २२ थरी सल्लाहकार

पूर्वाधार विकासमन्त्रीका लागि २२ थरी सल्लाहकार राख्ने गरी प्रस्ताव तयार पारिएको छ। पूर्वाधार विकास मन्त्रालयले तयार पारेको प्रस्तावमा मन्त्रीले एआईदेखि स्यानिटरीसम्मका सल्लाहकार राख्न पाउने छन्। उक्त प्रस्ताव हाल मन्त्रिपरिषद् तथा प्रधानमन्त्री कार्यालयमा पुगेको छ। मन्त्रिपरिषद्ले पास गरेपछि प्रस्ताव कार्यान्वयनमा जाने छ।

मन्त्रालय स्रोतका अनुसार पूर्वाधारमन्त्रीले २२ थरी सल्लाहकारसहित आफ्नो सचिवालयमा ३९ जनासम्म सदस्य राख्न सक्ने छन्। २२ थरीमध्ये विज्ञ सल्लाकारमा सचिवसरहका एक र सहसचिवसरहका एक रहने छन्। ती विज्ञ सल्लाहकार स्थानीय पूर्वाधार तथा झोलुंगे र खानेपानी तथा ढल व्यवस्थापनसम्बद्ध हुन सक्ने व्यवस्था गरिएको छ। उपसचिवसरहका चार सल्लाहकार राख्न पाउने व्यवस्था गरिएको छ, जो सडक, पुल, भवन तथा आवाससँग सम्बन्धित हुनुपर्ने छ।