सुनकोशी नदीमा खसेको कारमा सवार यात्रुमध्ये दुई जनाको पहिचान खुल्यो

सिन्धुलीको फिक्कल गाउँपालिका–२ नवलपुरघाट नजिक मध्यपहाडी लोकमार्गमा आज बिहान सुनकोशी नदीमा खसेको कारमा सवार यात्रुमध्ये दुई जनाको पहिचान खुलेको छ। अन्य दुई जनाको अवस्था अझै अज्ञात रहेको छ भने खोजी तथा उद्धार कार्य तीव्र पारिएको छ।

सिन्धुली प्रहरीका अनुसार आज बिहान करिब ११ः४५ बजे काठमाडौंबाट ओखलढुंगातर्फ जाँदै गरेको बा.प्र.०८–००१ ख ०१४४ नम्बरको यात्रुवाहक बस र विपरीत दिशाबाट खोटाङबाट खुर्कोटतर्फ आउँदै गरेको सडक विभाग यान्त्रिक कार्यालय मुलकोटअन्तर्गत प्रयोग हुने कार एकआपसमा ठोक्किएका थिए। ठक्करको प्रभावले कार करिब ५० फिट तल सुनकोशी नदीमा खसेको हो।