दुर्गा प्रसाईलाई तत्काल रिहाइ गर्न धवलशमशेरको आग्रह

काठमाडौँ- राष्ट्रिय प्रजातन्त्र पार्टीका पूर्वनेता एवं प्रस्तावित जय नेपाल पार्टीका नेता धवलशमशेर राणाले दुर्गा प्रसाईलाई तत्काल रिहाइ गर्न माग गरेका छन्। कसैले अभिव्यक्ति दिएकै आधारमा पक्राउ गर्नु निन्दनीय भएको भन्दै राणाले रिहाइको माग गरेका हुन्। राप्रपा छाडेका राणा र प्रसाई मिलेर नयाँ राष्ट्रवादी बनाउने तयारीमा छन्। उनीहरू पार्टीको गृहकार्यमा रहेका बेला प्रहरीले प्रसाईलाई पक्राउ गरेको हो।

राजा र हिन्दु राष्ट्रलाई मुल मुद्दा बनाएर नयाँ पार्टी बनाउने तयारीमा राणा–प्रसाई छन्। यही तयारीका लागि प्रसाईले अब राजसंस्था फर्काउनेगरी आन्दोलन गर्ने अभिव्यक्ति दिएका थिए। प्रहरीले उनले दिएको अभिव्यक्तिकै आधारमा पक्राउ गरेको राणाको ठहर छ।