नेपाल भलिबल संघले अन्तर्राष्ट्रिय भलिबल प्रतियोगिता आयोजना गर्ने

काठमाडौं : नेपाल भलिबल संघले चालू आर्थिक वर्षमा ४ वटा अन्तर्राष्ट्रिय भलिबल प्रतियोगिता आयोजना गर्ने भएको छ। सोमबार काठमाडौंमा आर्थिक वर्ष ०८३/०८४ को वार्षिक कार्यक्रम सार्वजनिक गर्दै संघले चालू आर्थिक वर्षमा नेपालमा सेन्ट्रल एशियन भलिबल एसोसियसन (काभा) महिला च्याम्पियन्स लिग, काभा पुरुष भलिबल च्याम्पियनसिप, काभा पुरुष च्यालेन्ज कप र थ्री नेसन्स कप प्रतियोगिता आयोजना गर्ने जनाएको हो। महिला च्याम्पियन्स लिग १ देखि ७ सेप्टेम्बरसम्म काठमाडौंमा हुने संघले जनाएको छ।

संघले ३५औंपुरुष तथा २५औं महिला राष्ट्रिय भलिबल प्रतियोगिता सुर्खेतमा, १०औं क्लब भलिबल च्याम्पियनसिप, काठमाडौंमा, ११ औं प्रधानमन्त्री कप र ७ औं महिला तथा आठौं पुरुष राष्ट्रिय बिच भलिबल आयोजना गर्ने समेत जानकारी गराएको छ।