‘भोटेकोशी बाढी, ग्लोबल वार्मिङको कारण’

काठमाडौं : भोटेकोशीमा आएको आकस्मिक महाबाढीलाई जलवायु परिवर्तन र ग्लोबल वार्मिङको परिणाम मान्न सकिने विज्ञहरूले बताएका छन्। बुधबार आएको महाबाढीपछिको कारण के हो भन्ने विषयमा तर्कवितर्क हुँदै आए पनि यसलाई जलवायु परिवर्तनको उपज मान्नुपर्ने कृषि, वन तथा वातावरण मन्त्रालयका प्रवक्ता महेश्वर ढकालले बताए।

अल्पविकसित देशहरूको सहायता टोली (एलडीसी) का प्रमुख तथा जलवायु अध्येता मञ्जित ढकाल पनि रसुवामा आएको बाढीको घटनालाई जलवायु परिवर्तनको कारण मान्नुपर्ने बताउँछन्। ‘कुनै पनि घटना भइसकेपछि जलवायु परिवर्तनसँग सम्बन्ध के छ भनेर विशेष अध्ययन गरिन्छ,’ उनले भने, ‘यसलाई क्लाइमेट एटिब्युसन भन्छौं। यो घटनाको सम्बन्ध एकदम स्पष्ट देखिन्छ। सामान्य हिसाबमा बुझ्दा तापक्रम बढेपछि हिउँ पग्लिन्छ। आईपीसीसी रिपोर्टहरूले पनि यस्ता खालका घटना हुन्छ भनेर भनिसकेको छ। अझ मैले गरेको अध्ययनले त यस्ता घटना तीन गुणाले हुन्छन् भनेको छ। त्यसैले यसलाई जलवायु परिवर्तनको कारण भएको भन्न मिल्छ।’