मतयाः परम्परा धान्दै युवा पूस्ता, पूर्वज सम्झिदैं दीपयात्रा

काठमाडौं । गाईजात्राको भोलिपल्ट ललितपुरमा नेवाः समुदायले दिवंगत आफन्तको सम्झना र पुण्यको कामना गर्दै मतया जात्रा मनाउँदैछन् । परम्परागत भेषभूषा, बाजागाजा र दीपसहित विभिन्न शक्तिपीठ, मठमन्दिर तथा चैत्यको परिक्रमा गरिने मतयामा युवा पुस्ताको उत्साहजनक सहभागिताले संस्कृति संरक्षण र पूस्तान्तरणको सन्देश दिएको छ ।

गाईजात्राको भोलीपल्ट काठमाडौं उपत्यकाको ललितपुरका नेवाः बस्तीमा फेरि अर्को सांस्कृतिक र धार्मिक माहोल सुरु हुन्छ । हातमा दियो, साथमा बाजागाजा, शरीरमा परम्परागत पहिरन अनि ओठमा श्रद्धाका भाव देखिने यो दृश्य हो मतया जात्राको । मतया अर्थात् दीपयात्रा । ललितपुरका नेवाः समुदायले हरेक वर्ष गाईजात्राको भोलिपल्ट, भाद्र कृष्ण द्वितीयाका दिन मनाउने यो जात्रा दिवंगत आफन्तको स्मरण, पुण्यको कामना र धार्मिक आस्थासँग जोडिएको छ ।