बाढीजन्य दुर्गन्धले संक्रमणको जोखिम

गत बुधबार भोटेकोशीमा आएको बाढीमा परी मृत्यु भएका मानव तथा पशुपन्छीको दुर्गन्ध फैलिन थालेको छ। उक्त नदीमा आइतबार पुनः आएको बाढीले माटोमुनि पुरिएका मानव तथा पशुपन्छी बाहिर निस्किएपछि दुर्गन्ध फैलिएको जिल्ला प्रशासन कार्यालयका सहायक प्रमुख जिल्ला अधिकारी कृष्णप्रसाद हुमागाईंले बताए। ‘आज (आइतबार) बिहान आएको बाढीले माटोभित्र मिसिएका मानव तथा पशुपन्छीका शरीर तथा टुक्राहरू बाहिर निकालेपछि दुर्गन्ध फैलिएको छ,’ उनले भने ।

रसुवाको वेत्रावती बगरमा पनि यस्तो गन्ध फैलिन थालेको बाढी प्रभावितहरूले जनाएका छन्। नुवाकोटको देवीघाटमा पनि आइतबार तीन वटा मृत गाई बाहिर निस्किएको अवस्थामा फेला परेको पशु सेवा विभागका पशु चिकित्सक नवराज श्रेष्ठले बताए। पशुहरू भेटिनेबित्तिकै व्यवस्थापनका लागि स्थानीय निकायसँग समन्वय गरिएको र देशभरबाट एम्बुलेन्स तथा अन्य शव व्यवस्थापनका गाडी प्रभावित जिल्लामा पुगेको उनले जानकारी दिए। ‘काठमाडौं महानगरले पनि थुप्रै यस्ता एम्बुलेन्स र गाडी पठाएको छ,’ उनले भने। दुर्गन्ध तथा कीटाणु फैलिन नदिन कीटनाशक रसायन प्रयोग गर्ने व्यवस्था पनि मिलाइएको उनले बताए ।