टिनको टहराभित्र परालले छोपेको अवस्थामा महिलाको शव फेला

काठमाडौं –  भक्तपुरको चाँगुनारायण नगरपालिका–७ बागरेमा मृतावस्थामा फेलापरेकी महिलाको पहिचान खुलेको छ । मृत फेलापरेकी महिला काभ्रेको नमोबुद्धकी जेनिसा नगरकोटी रहेको खुलेको छ । उनी मृत भेटिएकै स्थानवरपर बस्दै आएको र मजदुरी काम गर्दै आएको प्रहरी अनुसन्धानका क्रममा खुलेको छ ।

घटनाको प्रकृति हेर्दा उनको हत्या भएको हुनसक्ने प्रहरी अनुमान छ ।

गए राति चाँगुनारायण नगरपालिका–७, बागरेस्थित तरकारी खेती हुँदै आएको जग्गामा टिनको कच्ची टहराभित्र परालले छोपेको अवस्थामा महिलाको शव फेला परेको थियो ।

टहरोमा शव रहेको जानकारी पाए लगत्तै महानगरीय प्रहरी परिसर भक्तपुरबाट प्रहरी उपरीक्षक (एसपी) शिव कुमार श्रेष्ठको कमाण्डमा अनुसन्धान अधिकृत सहितको प्रहरी टोली गएको थियो । सो टोलीले घटनास्थल प्रकृति तथा लाश जाँच मुचुल्का गरी पोष्टमार्टमको लागि केएमसी अस्पताल दुवाकोट पठाएको र थप अनुसन्धान कार्य भइरहेको प्रहरीले जनाएको छ ।