साउनदेखि सरकारी कर्मचारीका लागि स्वास्थ्य बीमा अनिवार्य गरिने

सरकारले आगामी साउन महिनादेखि सरकारी कर्मचारीलाई स्वास्थ्य बीमा कार्यक्रममा अनिवार्य रूपमा आबद्ध गराउने तयारी गरेको छ। स्वास्थ्य तथा जनसंख्या मन्त्रालयले यसका लागि आवश्यक कार्यविधि निर्माणको काम अघि बढाएको जनाएको छ।

आइतबार मन्त्रालयमा आयोजित पत्रकार सम्मेलनमा स्वास्थ्य सचिव डा. विकास देवकोटाले सरकारी कर्मचारीलाई स्वास्थ्य बीमामा अनिवार्य रूपमा समेट्न आवश्यक कानुनी तथा प्रशासनिक व्यवस्था तयार भइरहेको जानकारी दिए। उनका अनुसार कार्यक्रमलाई प्रभावकारी बनाउन बाध्यकारी प्रावधान लागू गर्ने तयारी भइरहेको छ। स्वास्थ्य बीमा कार्यक्रमलाई थप व्यवस्थित र दिगो बनाउन सरकारले यो कदम चाल्न लागेको सचिव देवकोटाले बताए। उनले स्वास्थ्य बीमा सरकारको प्राथमिकतामा परेकै कारण आगामी आर्थिक वर्षका लागि कार्यक्रमको बजेट उल्लेख्य रूपमा वृद्धि गरिएको जानकारी दिए।