बिरामीलाई सहुलियत दिन निजीको आलटाल

सरकारले सरकारी, सामुदायिक र निजी अस्पतालले अनिवार्य रूपमा विपन्न तथा असहाय बिरामीका लागि १० प्रतिशत शय्यासहित सम्पूर्ण सेवा निःशुल्क प्रदान गनुपर्ने अनलाइन पोर्टल जारी गरेपछि निजी अस्पतालरूको संगठन ‘अफिन’ (एसोसिएसन अफ प्राइभेट हेल्थ इन्सिटच्युसन अफ नेपाल) ले त्यसलाई अस्वीकार गर्दै आएको छ। सरकारले जारी गरेका शासकीय सुधारसम्बन्धी एक सय कार्यसूचीमा यो पनि समावेश छ।

शासकीय सुधारसम्बन्धी कार्यसूची अनुसार स्वास्थ्य तथा खाद्य सुरक्षा मन्त्रालयले ‘लक्षित वर्ग निःशुल्क उपचार कार्यविधि’सहित उपचार पोर्टल जारी गरेको छ। पोर्टललाई मन्त्रालयको वेबसाइटमा राखिएको छ। यसबाट कुन अस्पतालमा कति निःशुल्क शय्या खाली छ वा छैन भन्ने जोसुकैले पनि हेर्न मिल्छ। सेवा दिने र लिने दुवै पक्षलाई पारदर्शी बनाउन यो व्यवस्था गरिएको मन्त्रालयले जनाएको छ।