भोटेकोशी बाढीको छैटौं दिन : १० हजार ४५१ जनाको उद्धार, ४११ हवाइ उडान

रसुवाको भोटेकोशीमा गत साता बुधबार बिहान आएको बाढीपछि छैटौं दिन सोमबार पनि खोज तथा उद्धारको काम जारी छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सोमबार बिहान ९ बजेसम्म १० हजार ४५१ जनाको उद्धार गरिएको छ। उद्धार अभियानअन्तर्गत नेपाली सेनाले हवाइ माध्यमबाट २५२ जना विदेशी र तीन हजार ३४४ जना नेपालीको उद्धार गरेको छ। आइतबार जलविद्युत आयोजनाबाट १५ जना चिनियाँ र सात जना भारतीय नागरिकको समेत उद्धार गरिएको प्राधिकरणले जनाएको छ। प्रभावित क्षेत्रमा हालसम्म ४११ पटक हवाइ उडान भएका छन्। सोमबार मात्रै १७ वटा उडान भएका छन्।