देशभरि ग्यासकाे कृत्रिम अभाव

गत सातादेखि पाउन कठिन भएको एलपी ग्यासको अभाव अहिले झन् चुलिएको छ। सरकारले वितरण कार्यलाई सहज बनाउन अनेक प्रयास गरे पनि अझै उपभोक्ता खाली सिलिन्डर लिएर दिनभर लाइनमा बस्न बाध्य छन्। काठमाडौं उपत्यका लगायत अहिले देशभर ग्यास अभाव चुलिँदा उपभोक्ताले खाली सिलिन्डर बुझाएर पनि १० दिनसम्म एक सिलिन्डर ग्यास पाउन सकेका छैनन्।

नियामक निकाय नेपाल आयल निगमले काठमाडौंको आफ्नै कार्यालय परिसरबाट पनि ग्यास वितरण कार्य जारी राखेको छ। अहिले ग्यास अभावले सामान्य उपभोक्ता निकै मारमा परेका छन्। ग्यास अभाव चुलिएका कारण घरपरिवारदेखि होटल व्यवसायसम्म प्रभावित भएका छन्। यस्तो अभाव थेग्न नसक्ने अधिकांश उपभोक्ता विद्युतीय चुलो इन्डक्सन चलाउन थालेका छन् भने कतिपय उपभोक्ता दाउरा बाल्नसमेत बाध्य भएका छन्। यस्तो अभावमा नेपाल आयल निगमले अनावश्यक सञ्चिति र आपूर्ति व्यवस्थापन समस्याका कारण अभाव देखिएको बताउँदै उपभोक्तालाई आवश्यकताअनुसार मात्र ग्यास खरिद गर्न आग्रह गरेको छ।