शिक्षकको मागप्रति सरकारको उदासीनता

सरकारले शिक्षकको माग नसुनेपछि उनीहरुले आन्दोदनको बाटो रोजेका छन् । नेपाल शिक्षक महासंघले आन्दोलनबाटै सरकारसँग माग पूरा गर्ने रणनीति अपनाएको छ । गत १४ र १५ मा सम्पन्न केन्द्रीय कमिटीको बैठकलगत्तै परिषद्को बैठक र त्यसपछि सम्पन्न राष्ट्रिय परिषद्को बैठकले आन्दोलन गर्ने निष्कर्षमा पुगेको हो । भदौमा आन्दोलन गर्ने तयारी गरेको महासंघले मोडालिटी तयार गर्दै छ । शिक्षक र विद्यालय कर्मचारीका माग सम्बोधन नगरेको र ट्रेड युनियन अधिकारमा कुण्ठा लगाइएको भन्दै आन्दोलन गर्ने निर्णय गरेको हो । सरकारले शिक्षक र कर्मचारीको दबाब नसुनेपछि आन्दोलनको बाटो रोज्नुपरेको बताइएको छ ।

महासंघले शिक्षक र विद्यालय कर्मचारीका माग सम्बोधन गर्दा सरकार संवेदनशील नभएको आरोप लगाएको छ । सरकारले निजी विद्यालयका शिक्षकको माग सुनेन । शिक्षकलाई दिने सेवा सुविधाबारे केही बोलेन । संस्थागत विद्यालयमा कार्यरत शिक्षकको अवस्थाबारे सरकारले सुनेन । राहत, अस्थायी, ज्यालादारी, करारलगायत पदमा काम गरेका शिक्षकको माग पूरा गर्ने विषयमा उदासीन भयो । यही कारण सरकारलाई झुकाउन आन्दोलन गर्ने चेतावनी महासंघले दिएको हो । महासंघले आफ्ना सम्पूर्ण शिक्षक तथा कर्मचारीहरूलाई आन्दोलनका लागि तयार रहन अपिलसमेत गरेको छ । गतवर्ष सरकारसँग भएका सहमति कार्यान्वयन नभएको महासंघको आरोप छ ।