नेपाल, भारत र चीनबीच त्रिदेशीय आर्थिक विकास

नेपाल, भारत र चीन दक्षिण एसियाका महत्त्वपूर्ण देशहरु हुन् । चीन आज विश्व अर्थतन्त्रको उदीयमान देशको रुपमा अगाडि बढेको छ । यस्तै भारत पनि आर्थिक विकासमा महत्त्वपूर्ण हिसाबले अगाडि बढेको छ । यसरी दुई ठूला अर्थतन्त्र भएका देशको बीचमा रहेको नेपाललाई ‘दुई ढुंगाबीचको तरुल’ मात्रै होइन, ‘आर्थिक विकासको पुल’ को रुपमा विकास गर्ने गरी त्रिदेशीय साझेदारीमा आर्थिक विकासका लागि पहल गर्नुपर्ने टड्कारो खाँचो रहेको छ ।

यस सन्दर्भमा चीनले स्थल तथा सामुद्रिक मार्ग निर्माण र विस्तार गरेर एक–अर्का देशका बीचमा व्यापारको विकास र विस्तार गर्ने, देशहरुका बीचमा उत्पादन वृद्धि गर्ने, कनेक्टिभिटीको विकास गरेर जनस्तरका बीचमा सुसम्बन्ध कायम गर्ने र शान्ति कायम गरेर नयाँ विश्व–निर्माण गर्ने अन्तर्निहित उद्देश्यका साथ बेल्ट एन्ड रोड इनिसियटिभ– बीआरआई विकासको अवधारणालाई लाई बढाएको छ । चीनको बीआरआई अवधारणाअन्तर्गत नै आर्थिक विकासको त्रिदेशीय सम्पर्क सञ्जाल निर्माण हुन सक्छ ।